Из сообщения летописи о восстании смердов в Ростово-Суздальской земле с упоминанием поселения Усть-Шексна

Бывши бо единою скудости в Ростовьстей области вьстаста два полъхва от Ярославля, глаголюща: «яко ве свеве, кто обилье держнть», и поидоста по Волзе, кде приидуча в погост, туже нарекаста лучьшие жены, глаголюща, яко си жито держить, а си мед, а си рыбы, а си скору. И привожаху к нима сестры своя, матере и жены своя; она же в мечте прорезавша за плечемь, выиимаста любо жито, любо рыбу, и убивашета многы жены, и именье их отьимашета собе. И придоста на Белоозеро; и бе у нею людий инех 300. В се же время приключися прити от Святослава дань емлющю Яневи, сыну Вышатину; поведоша ему белозерци, яко два кудесника избила уже многы жены по Вользе и по Шексне, и пришла еста семо. Ян же испытав, чья еста смерда, и увидев, яко своего князя, послав к ним, иже около ею суть, рече им: «выдайте волхва та семо, яко смерда еста моего князя»... Белозерци же шедше яша я, и приведоша я к Яневи. И рече има: «что ради погубиста толико человек». Онема же рекшема: «яко ти держать обилье, да еще истребиве их, будеть гобино; аще ли хощеши, то пред тобою вынемеве жито, ли рыбу, ли ино что». Янь же рече: «по истине лжа то».

(Она же рекоста): «нама стати пред Святославом, а ты не можеши створити ничтоже». Янь же повеле бити я и поторгати браде ею. Сима же тепенома и браде ею поторгане проскепом, рече има Янь: «что вама бози молвять?» Онема же рекшема: «стати нам пред Святославом». И повеле Янь вложити рубль в уста има и привязати я к упругу, и пусти пред собою (в) лодье, и сам по них иде. Сташа на устьи Шексны, и рече има Янь: «что вам бози молвять?» Она же реста: «сице нама бози молвять, не быти нама живым от тобе». И рече има Янь: «то ти вама право поведали». Она же рекоста: «но аще на путиши, много ти добра будеть; аще ли наю погубиши, многу печаль приимеши и зло». Он же рече има: «аще ваю пущю то зло ми будеть от бога; (аще ль вас погублю, то мзда ми будеть)». И рече Янь повозником: «ци кому вас кто родин убьен от сею?» Они же реша: «мне мати, другому сестра, иному роженье». Он же рече им: «мьстите своих». Они же поимше, убиша я и повесиша я па дубе...